Pito ka adlaw human sa iyang inagurasyon, si Dapitan City Mayor Seth Frederick “Bullet” Jalosjos nangulo kagahapon, Hulyo 7, sa third quarterly meeting sa City Peace and Order Council (CPOC) sa Amphitheater, Government Center.
Uban ni Mayor Jalosjos sa maong tigum sila Vice Mayor Alfredo “Al” Sy, City Administrator Atty. Amalou Tumapon-Monroyo, City Councilor Atty. Claver Pajaren, ug mga hepe sa nagkadaiyang buhatan sa nasyonal ug lokal nga pangagamhanan.
Pinaagi sa tabang sa buhatan ni city local government operations officer Solomon Morandarte, diin maoy CPOC secretariat, sila acting chief of police PLTCol. Philmore Dumagat, 1Lt. Edrian Resueño sa Philippine Army’s 97th Infantry Battalion, ug provincial drug enforcement officer Marvin Santos mipresentar matag usa sa crime reports, security updates, ug drug situation sa dakbayan.
Sa report ni PLTCol. Dumagat, bisan ang buhatan sa pulisya adunay kasong padayong giimbestigahan sa kasamtangan, nagpabiling “crime rate is low and generally peaceful” ang syudad.
Gibutyag usab ni Mayor Jalosjos nga iyang nakita nga nagkinahanglan ang dakbayan sa tourist police alang sa siguridad sa mga dumuduong, ilabi na nga matud pa niya, ang turismo maoy “second economic driver” sa Dapitan ug tinguha sa kagamhanang lokal nga mahimo ang dakbayan nga “tourism capital” sa tibuok probinsya sa Zamboanga del Norte.
Buot usab sa mayor nga makapalit ang kagamhanan sa dugang kahimanan aron padayong andam ang syudad alang sa dinaliang pagresponde sa panahon sa kalamidad.
Subay sa nagsingabot nga Kinabayo Festival ning bulan sa Hulyo, gihangyo usab sa mayor ang kagamhanang probinsyal ilawom sa pagpangulo ni Gov. Rosalina “Nanay Nene” Jalosjos nga mahatagan ug duha ka fire trucks ang Dapitan City Fire Station. Nasayran gikan kang SInsp. Edilmyr Viray, ang city fire marshall, nga ang ilang buhatan aduna lamang usa ka functional fire truck.
Atul sa tigum nahisgotan usab ang reconstitution sa CPOC ug Peace and Order and Public Safety-Technical Working Group (POPS-TWG) alang sa tuig 2022.
(Source: City Information Division-CID-Dapitan Facebook page)