Malipayon nga gidawat sa mga lumulupyo sa Brgy. Sicayab ang “Handog Pamasko” gikan sa kagamhanang lokal sa Dipolog kagahapon, Disyembre 9 ning tuiga, sa may alas 9:00 ang takna didto sa covered court sa Zamboanga del Norte 1st Provincial Mobile Force Company (ZN 1st PMFC), ning dakbayan.
Si Mayor Darel Dexter T. Uy, kauban sa pipila ka miyembro sa konseho ning dakbayan nga sila si Marilou Calibo, James Cyril Ruiz III, Praxides Rubia, Roger Asprer, Sicayab Punong Barangay Julius Gajonera uban usab ni kanhi Congressman Atty. Roseller Barinaga, ang mi-apod-apod sa 1,836 ka mga food packs, nga malipayong gidawat sa mga resipiyentes.
Atol sa nasangpit nga kalihukan, gidasig ni Mayor Uy ang mga taga-Sicayab nga ipadayon ang panaghi-usa aron padayon ang pag-asenso ug paglambo sa Dipolog bisan pa man sa nasinati nato nga pandemya. Dugang niya, nga ang pagtambayayong sa barangay, city government ug provincial government uban sa tabang sa Ginoo maoy mag-agak sa tanan alang na sa paspas nga kalamboan.
Mitambong usab si kanhi Dipolog City Mayor Evelyn T. Uy diin siya nagpasalamat tungod kay siya gidapit sa nasangpit nga kalihukan, uban sa pagpadayag sa iyang kalipay nga nahimamat na usab niya ang mga lumulupyo dinhi nga sa dugay-dugay nga panahon wala na niya nabisita.
Samtang sa may kapin kon kulang alas 2:00 ang takna sa hapon sa susamang adlaw, nakadawat usab ang mokabat sa 792 ka mga resiyentes gikan sa Brgy. Biasong sa susamang mga food packs.
Sa gihapon kini gitambongan nila ni Mayor Uy ug mga miyembro sa konseho sa dakbayan sa Dipolog lakip na usab sa konseho sa Barangay Biasong sa pagpangulo ni Punong Barangay Florenda R. Agustin
Sigun sa nasayran nga ang pagpanghatag sa Handog Pamasko tinuig kining gipahigayon sa kagamhanang lokal sa Dipolog sa pagdumala ni Mayor Uy, sukad siya milingkod isip mayor ning dakbayan niadtong tuig 2016.
(News and photo courtesy of Dipolog City Government Facebook page)
