Isip tubag ngadto sa hangyo sa atong mga vendors dinha sa Dipolog Boulevard, gimando ni City Mayor Darel Dexter T. Uy pinaagi ni City Administrator, Atty. Edwin Prince Gonzales ang dinali-ang pagpa-limpiyo sa dalan porsiyon sa atong Dipolog Boulevard, niadtong nakalabay nga Nobyember 1, 2022 gikan sa alas 6:00 ngadto sa alas 8:00 ang takna sa buntag.
Ang maong paglimpiyo ang gihimo pinaagi sa pagbanwas o “flushing” sa dalan gikan sa Boulevard Stage ngadto na sa Velasco St. aron masiguro ang pagbanwas sa mga balas (sand) gikan sa maong dalan, nga nakahatag og perwisyo ngadto sa atong mga vendors ingon man usab sa mga customers niini dinhang dapita.
Tungod niini, nakahatag kini og kahasol sa atong mga katawhan nga mosuroy dinha sa boulevard, ilabi na gyud kon kini ang manga-on dinha sa atong mga stalls nga nagbaligya sa pagkaon.
Tungod niini, gipadangat sa mga vendors ang ilang nasinating kahasol ngadto sa kagamhanang lokal ning siyudad, diin diha dayon, gimando ni Mayor Darel Dexter T. Uy ang paghatag sa dinali-ang pagtubag niini.
Pinaagi sa gihimong hangyo ni City Administrator, Atty. Prince Gonzales ngadto sa Bureau of Fire Protection ning siyudad alang sa paggamit sa Firetruck nga mohimo sa flushing, ang linangkob nga team sa Boulevard Management uban sa Dipolog City Task Force on Road Clearing Operation ilawom sa pagdumala ni Boulevard Manager, Mr. Regie Lavictoria ug sa Dipolog City Fire Department ubos sa kamandoan ni City Fire Marshal, Fire Senior Inspector, Edselle Manogura, nahimong malamposon ang nasangpit nga kalihokan nga nakahatag usab og alibyo ngadto sa atong mga kaigsoonang vendors dinha sa nahisgotang dapit.
(Source: Dipolog City Government Facebook page)