Nakugang pag ayo ang usa ka gwardya human niya makita ang kalabera sa usa ka tawo sa lugar nga iyang gibantayan.
Pasado alas 10:50 kagahapon sa buntag, Nobembre 3,2022, naabot ang taho sa Naga City Police Station, nga adunay napalgang kalabera didto sa Quarry Site, Sulod sa Apo Cement Inc.
Dali kining gi respondihan nila ni PCpl. Lacay, Pat Lemoran ug Pat Banay-Banay sa naasoy nga lugar.
Segon ni PLTCOL. Junnel Caadlawon ang hepe sa Naga City Police Station nga sa gihimo nga imbestigasyon nasayran nga ang maong lugar diin napalgan ang kalabera mao usab ang lugar nga nahitabo ang landslide kaniadtong Septembre 20, 2018.
Dugang sa Hepe nga gibutyag sa tagdumala sa APO Cement Inc. nga atol sa maong landslide nawala ang ilang watchman nga si Enaro Segovia.
Gituhuan kini nga naapil sa maong landslide ug ang kalabera nga nakit-an iya ni Segovia nga dugay na nga nawala.
Apan ang kapulisan sa Naga nag tawag gihapon sa taga SOCO-7 aron mo himo og dugang imbestigasyon kabahin sa maong kalabera nga nakit-an. (Renante Lada, photo courtesy of Naga City Police Station)