Gipahimutang isip prayoridad sa Bureau of Fire Protection (BFP) Region IX – Zamboanga del Norte ang pagpausbaw sa kahanas sa fire investigation pinaagi sa 5-Day Fire Investigation Seminar nga gihimo sa Dipolog Sports Complex, Olingan, kaniadtong Abril 28, 2026.
Gitambongan ang maong kalihokan sa 44 ka fire investigators gikan sa nagkadaiyang city ug municipal fire stations sa probinsya, uban ang 11 ka instructors gikan sa BFP Regional Office IX ug ubang lugar sa Region IX.
Sa pagbukas sa kalihukan, gipasiugda ni FSUPT Richard C. Timosa RN, JD, DSC, Acting Provincial Fire Marshal, ang kamahinungdanon sa padayon nga pagbansay aron mas mapalambo ang abilidad sa mga personahe sa pag-ila sa hinungdan sa sunog ug mas mapaspasan ang imbestigasyon.
Si FSUPT Jasmin S. Tanog, Lead Instructor, mipahat sa mga teknik ug best practices sa fire investigation operations ug mipadayag sa suporta sa padayon nga pagpalig-on sa investigative skills sa BFP personnel.
Sumala sa BFP, ang maong seminar gilauman nga makapausbaw sa kahusayan sa pag-imbestiga sa sunog, nga makatabang sa pagpugong sa sunod nga insidente ug sa pagpalig-on sa kaluwasan sa mga komunidad sa rehiyon.(IKEN B. GULLEM)
Source: BFP R9 Zamboanga del Norte Provincial Office