Dali nga mitubag ang mga personnel sa Dapitan City Fire Station Shift A ubos sa pagpangulo ni FSINSP Rommel M. Rojas, REE, Acting City Fire Marshal, sa usa ka emergency call nga naglambigit sa pasyenteng kalit nga nakuyapan ug nakasinati og grabeng kaluya.
Pag-abot sa lugar, ilang nasuta nga ang pasyente adunay peligroso kaayong taas nga blood pressure nga miabot sa 180/120 mmHg, uban sa paspas nga pagpitik sa kasingkasing nga 125 beats kada minuto. Bisan pa man nga conscious ang pasyente, makita ang iyang kahuyang ug hinay nga pagtubag.
Tungod sa kritikal nga kahimtang, gilayon siyang gihatagan og pag-atiman sa mga responder aron mapabiling kalmado ug lig-on ang kondisyon samtang padayon nga gimonitor ang iyang vital signs. Human makuha ang pagtugot sa pasyente, luwas siyang gidala sa ambulansya padulong sa Dr. Jose Rizal Memorial Hospital alang sa dugang medikal nga pag-atiman.
Malampusong naturn-over ang pasyente ngadto sa mga health personnel sa ospital, samtang ang EMS team mibalik sa estasyon ug gipahimutang pag-usab ang ambulansya sa alert status alang sa sunod nga emerhensya.
Gipahinumdoman usab sa Dapitan City Fire Station ang publiko sa kahinungdanon sa regular nga pag-inom sa maintenance medicines ug pagmonitor sa panglawas aron malikayan ang seryosong komplikasyon nga mahimong hulga sa kinabuhi.(JENIFFER JR. DELICA)
Source: BFP R9 Dapitan City Fire Station