DAPITAN CITY – Misagop dayon ang personahe sa Dapitan City Fire Station Shift B sa usa ka emerhensyang medikal human sa usa ka aksidente sa kadalanan sa Barangay Sulangon niadtong Enero 19, 2026, ilalom sa liderato ni FSINSP Rommel M. Rojas, REE, Acting City Fire Marshal.
Pag-abot sa lugar, gisusi sa Emergency Medical Services team ang usa ka 41-anyos nga lalaki nga pasyente nga anaa ra sa panimuot. Nakaplagan nga adunay mga gasgas sa mga kamot ug tuhod ug nagreklamo og kasakit sa tuo nga abaga. Gihatagan dayon siya og hustong first aid lakip ang paglimpyo ug pagtabon sa mga samad, ug walay nakit-an nga timailhan sa bali base sa pisikal nga eksaminasyon.
Gikuha ug gidokumento sa mga responder ang vital signs ug blood pressure sa pasyente isip kabahin sa standard medical assessment. Mibalibad ang pasyente nga ipatransport sa duol nga medical facility ug mipirma og waiver human mapahimangnoan sa iyang kahimtangan ug sa mga posibleng risgo.(JENIFFER JR. DELICA)
Source: BFP R9 Dapitan City Fire Station