Mapasalamaton ang mga katawhan sa nagkadaiyang barangay sa lungsod sa Katipunan, Zamboanga del Norte human opisyal nga naabot ug naimplementar ang programang “Benteng Bigas” didto sa Barangay Malasay, Sinuyak, Seres, ug Fimagas, diin daghang residente ang nakabenepisyo sa mas baratong presyo sa bugas.
Kini nga inisyatibo usa sa gipatuman sa administrasyon ni Pres. Ferdinand ‘Bongbong’ Marcos Jr., pinaagi sa panagtinabangay sa Department of Agriculture, sa Provincial Government, ug sa lokal nga panggamhanan.
Kabahin usab kini sa mas lapad nga tumong ni Gov. Darel Uy nga mapakunhod ang kahimtang sa kakabus sa probinsya pinaagi sa mas accessible nga suplay sa pagkaon.
Sa lebel sa lungsod, gipasiugda ni Maiko Wong ang paghatod sa serbisyo hangtod sa mga liblib nga barangay ug gisiguro sa lokal nga liderato nga ang distribusyon sa bugas mahitabo duol sa mga panimalay aron malikayan ang dugang gasto ug kalisod sa mga residente.
Samtang, giila kini isip usa sa mga lakang sa pagpalig-on sa seguridad sa pagkaon ug pagtabang sa panginabuhian sa mga lumulupyo sa lungsod.(IKEN B. GULLEM)
Source: Municipal Agriculture Katipunan