Way kokalouy nga gibilin sa usa ka inahan ang iyang gipanganak nga batang lalaki sa usa ka balay sa barangay Sta. Isabel, dakbayan sa Dipolog niadtong Marso 24 ning tuiga.
Nasayran gikan kang Ms. Ana Marie Ello, Social Welfare Assistant, nga bag-ong panganak nga batang lalaki ang gibilin sa way puangod niyang inahan sa panimalay sa usa ka Joseph G. Acevedo, sa may Purok Dos, barangay Sta. Isabel, dakbayan sa Dipolog, kapin kun kulang alas tres ang takna sa hapon.
Sumala pa sa taho, diha pa sa bata ang umbilical cord kun pusod dihang nakit-an kini sa tagbalay. Gisulod ang bata sa blue nga bag, uban sa itom nga jacket ug unlan nga green.
Sa pagka karon, ang bata anaa sa pag amoma sa CSWD samtang gipanawagan pa ang inahan niini nga magpaila o magpakita sa mga tinugyanan aron matabangan o kaha masabotan kun unsay angay buhaton sa iyang anak. Tinguha usab niini, aron masayran unsay hinungdan nganong nakahimo siya sa pag biya sa bata.
(Source: Dipolog City Government Facebook Page)
