Mukabat sa kapin P200,000 ka pesos nga balor sa ilegal nga drugas ang nasakmit sa mga otoridad gikan sa usa ka Newly identified street level individual atol sa gipatoman nga hiniusang drug buy-bust operation mga alas 5:15 ang takna sa hapon niadtong Enero 12,2026,didto sa Purok Buli, Barangay Minaog, Dipolog.
Naila ang suspek nga usa ka 29 anyos nga lalaki, ulitawo, walay trabaho, ug residente sa Barangay Olingan, Dipolog City, Zamboanga del Norte, usa ka bag-ong nailhan nga Street-Level Individual (SLI), kinsa nakumpiskahan sa mutimbang 30 gramos sa gituohang shabu nga adunay gibanabanang presyo nga balor sa Php 204,000.00.
Ang pagkakumpiska sa nasangpit na drugas ug pagkasikop sa suspek ,gihimo pinaagi sa mga personahe sa Zamboanga del Norte Police Drug Enforcement Unit (ZNPDEU) (lead unit) uban sa mga personahe sa Dipolog City Police Station, 5th SOU PNP-MG, ug 901st MC RMFB9, uban sa koordinasyon sa PDEA-9.
Nakumpiska gikan sa suspek atol sa operasyon ang usa ka gamay nga heat-sealed transparent plastic sachet nga adunay sulod nga gituohang shabu (buy-bust item), tulo ka dagkong heat-sealed transparent plastic sachet nga adunay sulod nga gituohang shabu (possession), usa ka pakete sa sigarilyo (BERLIN) ug usa ka transparent plastic sachet nga gigamit isip sudlanan, usa ka Php 1,000.00 nga marked money nga adunay Serial No. BL 2101651, usa ka unit sa TECHNO smartphone (yellow) nga adunay casing, ug usa ka unit sa Honda Click 125 nga motorsiklo (pula/itom) nga adunay Plate No. 136 JXE nga adunay yawe.
Ang mga nakumpiska nga droga gitugyan ngadto sa Zamboanga del Norte Provincial Forensic Unit alang sa laboratory examination, samtang ang nadakpan nga suspek anaa ubos sa protective custody sa Dipolog CPS alang sa hustong disposisyon.(MEDALYN U. BORJA)
Source: ZNPPO