Sa pinakaunang higayon nga tournament, ang mga nagkadaiyang anglers ug personahe sa BJMP-Dipolog misalmot sa gipahigayong kompetisyon atol sa 2026 Ultralight/ Light Casting Tournament didto sa Dipolog Recreational Fishing Port/ Breakwater sa may sunset boulevard, karong adlawa Hulyo 26, 2026.
Kini nga tournament nga gisalmotan sa 50 ka partisipante usa ka ‘Bait for a cause’ nga gi-host sa Dipolog City Jail Male Dormitory ubos sa mando sa ilang Regional Director Chief Superintendent Amado Concepcion Jr., uban sa koordinasyon ni City Councilor Hon. Kenny Val U. Ong ug sa suporta ni Club President Joven Realiza.
Tumong niini ang paghatag og dugang nga suporta sa mga Persons Deprived of Liberty (PDLs), pagpalapad sa ilang access sa gikinahanglang kagamitan, ug pagdugang sa heavy equipment alang sa ilang in-house bakery aron mas mapalambo ang ilang mga kalihokan sa panginabuhian.
Matud pa ni Jail Warden JCINSP Jonathan N Arawangsa, kini nga aktibidid nindot ipahigayon ilabina dili lang pang recreational activity busa diversion alang sa maayong mental health ug makakonektar sa komunidad.
Dugang pa ni SJO2 Sheila B Dela Victoria, CRS Officer kini nga aktibidid gitumong alang sa ilang mga PDLs.
” Ang proceeds para sa among PDLs nga anaa sa Jail, kay naa mi bakery and need namo i-upgrade ang mga heavy duty equipment para sa kaayohan sa among mga PDLs.
Misalmot usab sa maong tournament ang nagkadaiyang anglers club gikan sa Finest Breakers Hookers Good Vibes Dipolog & Dapitan Fishing, Zanorte Anglers Association, Good vibes fishing, Molave Anglers Club, Sindangan Anglers, Estuary fishers club, Tukuran Anglers club, Buanglers Club, ug ang Aurora Zamboanga del Sur.
Atol sa kompetisyon, nakuha ni Raymar Muro ang special award sa kategoryang Longest catch fish, samtang si Isagani Ferolino gikan Sindangan ang miangkon sa smallest catch fish nga kategorya. Wala usab magpapildi si Paul John Estrosos gikan sa Good vibes Fishing nga maoy nakabingwit sa first place sa kategoryang pinakadakong isda nga miangkon sa P5,000 cash award.
Sa laing bahin, gisugdan ang fishing tournament alas 5:30 sa buntag ug nahuman alas 2 sa hapon nga gitapos pinaagi sa paghatag certificates, plaque, ug awards atol sa awarding ceremony.(IKEN B. GULLEM)