Opisyal nga giablihan ang Enhanced Wellness Massage Clinic and Salon, usa ka proyekto nga gitukod alang sa Persons with Disability (PWD) sa siyudad, atol sa gipahigayon nga launching ug grand opening sa Dipolog City, Boulevard kagahapon buntag, adlaw’ng Martes, Hulyo 8, 2025.
Ang maong kalihokan gipangulohan ni Provincial Governor Darel Dexter T. Uy, nga midumala sa ribbon-cutting ceremony, kauban sila City Councilors Atty. Roseller L. Barinaga ug Dr. Ryan Neil Asprer, Dipolog PESO Manager Mr. Carlos P. Deloria, PWD Focal Person Mr. Ruel Zorilla, ug DOLE Region IX Field Office Chief LEO Ms. Aileen Mondejar. Mitambong usab ang mga dinapit nga bisita ug mga myembro sa asosasyon.
Ang pagkatukod sa Enhanced Wellness Massage Clinic and Salon nagtinguha sa paghatag og panginabuhian alang sa mga PWD ug pagpasiugda sa inclusive wellness services dinhi sa siyudad.
Gisuportahan kini sa lokal nga kagamhanan ug sa probinsya isip kabahin sa ilang kampanya sa pag-empower sa PWD sector ug pagtabang kanila nga makaambit sa lokal nga ekonomiya pinaagi sa skills training ug livelihood programs.
Sa iyang mensahe, gibutyag ni Governor Uy nga ang maong proyekto usa ka timaan sa padayon nga pagpakabana ug paghatag og importansya sa sektor sa PWD.
“Kini nga pasilidad dili lamang para sa panginabuhian sa PWDs, kundi usa usab ka oportunidad aron mapakita ang ilang kapasidad ug potensyal sa serbisyo alang sa komunidad,” matod sa gobernador.
Gilauman nga pinaagi sa maong klinika ug salon, mas daghang PWDs ang matabangan sa pagpanginabuhi samtang naghatag og kalidad nga wellness services alang sa mga Dipolognon ug sa mga bisita sa siyudad.(Jumalisa Papa)
Source: DIPOLOG CITY GOVERNMENT