Nadugangan na usab ang mga tambal ug medical supplies sa Sindangan District Hospital human maabot niadtong Agosto 4 ang bag-ong delivery aron suportahan ang nagkataas nga panginahanglan sa mga pasyente sa maong pasilidad.
Lakip sa mga nahidangat ang oxygen tanks, dextrose ug uban pang medical supplies nga gigamit sa adlaw-adlaw nga operasyon sa ospital, ilabina sa pagtubag sa mga emergency ug inpatient cases.
Sumala sa ospital, ang maong replenishment kabahin sa paningkamot aron masiguro ang padayon ug walay hunong nga paghatag og serbisyo medikal sa katawhan.
Sa pagkakaron, ang Sindangan District Hospital giingong ikaduha na sa Zamboanga del Norte Medical Center (ZNMC) sa probinsya kon basihan ang gidaghanon sa mga pasyente nga matag adlaw nagpaubos og pagtambal, nga nagpakita sa padayon nga pagsalig sa publiko sa serbisyo sa ospital.
Kahinumduman nga niadtong Hulyo 22 nakadawat usab ang ospital og dugang nga stocks sa tambal, diin daghang pasyente na ang nakapahimulos sa maong mga medisina.
Ang padayon nga pag-abot sa tambal ug medical supplies kabahin sa suporta sa Provincial Government of Zamboanga del Norte aron mapadayon ang igo nga serbisyo sa panglawas ug matubag ang panginahanglan sa mga residente sa Sindangan ug sa kasikbit nga mga lungsod.(IKEN B. GULLEM)
Source: Zamboanga del Norte Provincial News Network