Nanumpa na sa katungdanan si SAMA Provincial Chieftain Lahamuddin Iyoh Jailani isip bag-ong Provincial Indigenous Peoples Mandatory Representative o IPMR sa Zamboanga del Norte sa seremonya nga gipahigayon alas 10:00 sa buntag sa Governor’s Conference Room sa Provincial Capitol sa Barangay Estaka, Dipolog City.
Gidumala ni Governor Darel Dexter T. Uy ang pagpanumpa, inubanan ni Vice Governor Julius C. Napigquit, 3rd District Congressman Adrian Michael “Ian” A. Amatong ug Board Member Kay Marie P. Bolando. Mitambong usab ang pamilya ni Jailani, mga sakop sa Indigenous Peoples, ug mga opisyal sa NCIP lakip si Regional Director IV Atty. Adolf Ryan S. Lantion. Napili si Jailani isip IPMR pinaagi sa selection process nga gipahigayon sa NCIP niadtong Enero 14, 2026 sa Zamboanga del Norte Convention and Exhibition Center.
Gihimo ang maong proseso subay sa Revised IPMR Provincial Local Guidelines ilalom sa NCIP Administrative Order No. 1, Series of 2021 ug CEB Resolution No. 2023-09-07-063. Ang pagpanumpa ni Jailani nagpalig-on sa representasyon sa nagkadaiyang tribo sa probinsya sa Sangguniang Panlalawigan.(JENIFFER JR. DELICA)
Source: Zamboanga del Norte Provincial News Network