Dakong kalampusan ang natuman sa usa sa mga damgo sa lungsod sa Sergio Osmeña ubos sa liderato ni Mayor Glen N. Yu human opisyal nga itukod ang usa ka kolehiyo ubos sa partnership sa LGU-Osmeña ug Jose Rizal Memorial State University (JRMSU).
Gipadayag ni Mayor Glen kaniadtong Enero 10 nga napirmahan na sa miaging semana ang kasabutan tali sa LGU ug JRMSU, ug karong school year, bukas na ang duha ka kursong BS Criminology ug BS Business Administration.
Para sa permanente nga campus, nakapalit na ang LGU og 2 ka hektaryang luna ug giandam na ang pagtukod sa school building karong tuiga. Samtang maghulat, lima ka classroom ang gi-allocate sa LGU alang sa mga estudyante sa kolehiyo.
Sumala ni Mayor Yu, dako ang matipid sa mga ginikanan tungod kay dili na kinahanglan mo-eskwela sa Dipolog nga mogasto og kapin ₱5,000 matag bulan.
Una nang gitinguha sa LGU nga makig-partner sa UP Los Baños, apan tungod sa balaod nga usa ra ka state university ang pwede sa usa ka probinsya, ipatukod ang JRMSU–Sergio Osmeña, Sr. Campus.
Kini nga kolehiyo nagtimaan og bag-ong paglaum alang sa mga kabataan sa Osmeña ug kasikbit nga luga, diin edukasyon nga mas duol, mas abot-kaya, ug mas hayag ang kaugmaon.(IKEN B. GULLEM)
Source: Zamboanga del Norte Provincial News Network