Usa ka bag-ong panid sa pagserbisyo publiko ang giablihan sa probinsya sa Zamboanga del Norte human pormal nga gibendisyunan ang bag-ong na-renovate nga Provincial Governor’s Office nga nahimutang sa Provincial Capitol sa Barangay Estaka, Dipolog City, kaniadtong Disyembre 16, 2025.
Ang modernisasyon sa buhatan kabahin sa mas lapad nga paningkamot sa probinsyal nga pangagamhanan sa pagpaayo sa kahimtangan sa trabaho ug pagpalig-on sa episyensya sa pagdumala. Pinaagi sa mas organisado nga layout ug mas hapsay nga sistema, gilauman nga mas mapaspas ug mas sayon ang paghatag ug serbisyo ngadto sa mga lungsuranon.
Gipangulohan ni Governor Darel Dexter T. Uy ang kalihokan, kauban ang iyang asawa nga si Vanny Uy, uban sa ubang opisyal sa probinsya lakip si Vice Governor Julius Napigquit, mga miyembro sa Sangguniang Panlalawigan, ug mga empleyado sa kapitolyo.
Sumala sa mga opisyal, ang bag-ong Governor’s Office maghatag ug mas komportable nga palibot alang sa mga trabahante sa gobyerno ug makatabang sa mas epektibong pagpatuman sa mga programa ug proyekto sa probinsya. Ang maong inisyatiba nagpamatuod sa tinguha sa Zamboanga del Norte nga magpadayon sa modernong, transparent, ug responsableng pangagamhanan.(IKEN B. GULLEM)
Source: Zamboanga del Norte Provincial News Network