Nakadawat og bag-ong mga ekipo ug materyales alang sa pagproseso og mani ang Goin Agrarian Reform Beneficiaries Multipurpose Cooperative (GARBEMCO) sa Liloy, Zamboanga del Norte pinaagi sa suporta sa Department of Labor and Employment (DOLE) ug Department of Agrarian Reform (DAR).
Nagkantidad ang tabang og ₱653,000 ubos sa DOLE Integrated Livelihood Program (DILP) naglakip sa mga makina, kagamitan sa pagproseso, ug mga hilaw nga materyales aron mapalambo ang produksiyon, mapaayo ang kalidad sa mga produkto, ug madugangan ang kita sa mga miyembro sa kooperatiba.
Ang GARBEMCO usa sa mga Agrarian Reform Beneficiaries Organizations (ARBOs) nga gisuportahan sa DAR pinaagi sa Village Level Farm-focused Enterprise Development (VLFED) Project sukad pa niadtong 2019.
Gipangulohan sa mga opisyal sa DAR ug DOLE ang turnover sa mga ekipo, nga gitambongan usab sa mga lokal nga opisyal ug mga miyembro sa kooperatiba.
Human sa turnover, nagpahigayon ang DOLE og Occupational Safety and Health (OSH) orientation aron mapalig-on ang kahibalo sa mga miyembro sa husto ug luwas nga paggamit sa mga bag-ong ekipo.(IKEN B. GULLEM)
Source: DAR Zamboanga del Norte Province