Midagan dayon ang personnel sa Dapitan City Fire Station Shift A human madawat ang emergency medical call sa St. James the Greater Parish Catholic Church sa Dakbayan sa Dapitan niadtong Enero 11, 2026, ubos sa pagpanguna ni FSINSP Rommel M. Rojas, Acting City Fire Marshal. Pag-abot sa lugar, nakita ang usa ka 20 anyos nga babaye nga naglingkod ug giatiman na sa mga tawo sa simbahan. Klaro nga luya ang biktima, maputla ang panit, bugnaw ang lawas, ug nagreklamo og kalipong nga hapit na siya mahimatay.
Gibuhat dayon sa mga bombero ang unang pagtan-aw sa kahimtangan sa biktima ug gihimo ang gikinahanglan nga paunang pag-atiman. Gipahigda siya sulod sa ambulansya ug gibutangan og oxygen aron mapagaan ang iyang pagginhawa samtang padayon nga gibantayan ang iyang kahimtangan. Gisukod ang iyang vital signs ug nakita nga ubos ang presyon sa dugo ug oxygen level, hinungdan nga dali ug hapsay nga aksyon ang gihimo sa responders.
Human sa pipila ka higayon, miayo ang kahimtangan sa babaye ug mibalik sa normal ang iyang lawas. Tungod niini, nagpirma siya og waiver nga nagpasabot nga dili na siya magpadala sa ospital. Gipakita sa maong insidente ang kahinungdanon sa paspas nga aksyon sa Bureau of Fire Protection sa pagluwas sa kinabuhi, bisan pa sa mga emerhensiya nga mahitabo sa dili gilauman nga lugar sama sa simbahan.(JENIFFER JR. DELICA)
Source: BFP R9 Dapitan City Fire Station