Malampusong gihatod sa Zamboanga del Norte Medical Center Medical Team ang mga pasyente padulong sa Vicente Sotto Memorial Medical Center ug Cebu City Medical Center pinaagi sa luwas ug organisadong medical transport mission. Nanguna sa maong buluhaton si Nurse Joel Rey Carcasona kauban ang medical transport driver nga si Clyde Giangan, nga nagpakita og hapsay nga koordinasyon ug taas nga lebel sa propesyonalismo atol sa biyahe.
Ang kalampusan sa maong misyon nagpakita sa tinuod nga diwa sa pag-alagad sa katawhan—disiplina, dedikasyon, ug kasingkasing sa pag-atiman sa pasyente. Bisan sa kakapoy ug distansya, giprioridad sa team ang kahimtangan ug kaluwasan sa mga pasyente gikan Sugbo hangtod sa ilang destinasyon.
Dako usab ang pasalamat sa padayon nga suporta ug giya ni Gobernador Darel Uy nga nagpalig-on sa serbisyo panglawas sa probinsya, lakip na kang Dr. Esmeralda Nadela, Hospital Administrator sa ZNMC, ug kang Herdina Gallegos, Head sa ZNMC Medical Team, tungod sa ilang liderato ug suporta. Ang maong misyon usa ka klarong ehemplo sa tahas sa mga frontliners nga walay kapoy nga nag-alagad alang sa kinabuhi ug kaayohan sa katawhan.(JENIFFER JR. DELICA)
Source: Zamboanga del Norte Medical Team