Gibitbit ang 350 mil ka pesos sa Arno Cagayan de Oro isip champion sa gipahigayong PSBL 1st National Finals kagabii, Enero 19, 2025 didto sa ZN Convention and Sports Center, Estaka Dipolog City.
Human sa Round Robin games gipili niini ang Magic 4 Teams nga mao ang LBJ Dipolog, JHIM Farm Dapitan, Arno CDO ug Qualitech Iloilo. Nigawas nga mananaog sa Semifinals mao ang LBJ Dipolog ug Arno Cagayan de Oro nga maoy nagsangka sa Championship game diin gilubong sa CDO ug 40 puntos ang Dipolog sa score nga 90-40 nga maoy nakapaluya sa homecourt advantage sa Dipolog.
Sa maong dako nga kalihukan, gipasalamatan sa Assistant National Director sa PSBL nga si Mr. Mar David Nuñez si Zamboanga del Norte Governor Hon. Rosalina “Nanay Nene” Jalosjos ug Dapitan Mayor Seth Frederick “Bullet” Jalosjos  sa suporta niini isip host sa maong sports event. Dugang gipasalamatan usab sa PSBL sila si Sports Coordinator Gerson “Buddy” Cagbabanua ug Sports Organizer Julius Jaictin sa pag-asikaso usab sa mga delegates, coaches ug team managers and owners.
Samtang si ZN Liga ng mga Barangay Pres. Sushmita Jalosjos ang mitambong ug misaksi usab kagabii sa championship game diin gidugok kini sa liboan ka mga katawhan sa gikan sa lain-laing lugar.
Source: Buddy Cagbabanua, and Provincial Sports and Physical Fitness Coordination Unit