Nagpatigayon og mga lakang si Cong. Adrian ‘Ian’ Amatong aron mapalig-on ang sektor sa agrikultura sa 3rd District sa Zamboanga del Norte, pinaagi sa serye sa pakigkita sa mga lider sa agrikultura ug agri-entrepreneur alang sa mga inobatibong proyekto, niadtong Hulyo 4, 2025.
Gipasiugda sa kongresista ang duha ka prayoridad nga isyu: ang dugay nang problema sa irigasyon ug ang posibilidad sa pagpaila sa dragonfruit farming isip alternatibong panginabuhian sa mga mag-uuma.
Sa maong adlaw, personal nga nakigkita si Cong. Amatong kang National Irrigation Administration (NIA) Administrator Eduardo Guillen aron hisgutan ang mga long-term nga solusyon sa irigasyon. Tumong niini nga masiguro ang igong supply sa tubig sa mga umahan ug mapaayo ang produksyon sa ani sa tibuok distrito.
Si Administrator Guillen, usa ka Galing Pook Awardee ug kanhi mayor sa Piddig, Ilocos Norte, mipresentar sa iyang kasinatian sa modernong irigasyon ug pagpalambo sa kabaryohan pinaagi sa teknolohiya ug epektibong sistema sa patubig.
Gilauman ni Cong. Amatong nga mapatuman ang maayong mga pamaagi sa ilang distrito aron mas mapalambo ang kinabuhi sa mga mag-uuma.
“Dako kaayo ang papel sa irigasyon sa kinabuhi sa atong mga mag-uuma. Ang kasinatian ug ideya ni Administrator Guillen dakong tabang sa atong distrito. Naglaum ko nga mapatuman nato kini dinhi sa ato,” matud ni Cong. Amatong.
Gawas sa irigasyon, gisusi usab sa kongresista ang posibilidad sa pagpaila sa dragonfruit farming sa 3rd District pinaagi sa pakigkita kang Luis Macalincag, tag-iya sa Agbeam Farms Inc. Ilado ang farming system ni Macalincag sa pagka-episyente ug scalable, nga makahatag og dugang income opportunities sa mga mag-uuma sa probinsya.
Gipadayag ni Amatong nga dako ang potensyal sa dragonfruit farming nga mahimong alternatibong panginabuhian ug makatabang sa pag-diversify sa klase sa tanom sa ilang distrito.
“Dili lang kini maghatag og dugang kita sa atong mga mag-uuma, kundi makahatag sab og bag-ong oportunidad nga makapauswag sa agrikultura sa distrito,” dugang pa niya.
Ang maong mga lakang kabahin sa padayong paningkamot ni Cong. Amatong sa paghatag og suporta sa sektor sa agrikultura pinaagi sa inobasyon, praktikal nga mga solusyon, ug estratehikong pakigtambayayong alang sa kaayohan sa mga mag-uuma sa Zamboanga del Norte.(Jumalisa Papa)
Source: PIC