Alang sa pag-andam ug paghatag sakto nga kahibalo sa mga indibidwal nga nagtinguha nga mahimong adoptive ug foster parents, gipahigayon sa Local Government Unit (LGU) sa Gutalac ang usa ka seminar-workshop sa adoption ug foster care niadtong milabay nga adlaw.
Gipangunahan ang maong kakihokan sa Municipal Social Welfare and Development Office (MSWDO) ubos sa pagdumala ni Mrs. Margie Maratas, kauban ang National Authority for Child Care (NACC), isip kabahin sa padayon nga inisyatibo sa pagpalig-on sa serbisyo alang sa kabataan nga nanginahanglan og pamilya.
Sa diskusyon, gipatin-aw ang legal nga proseso sa adoption, ang mga responsibilidad sa mga mag-amuma, ug ang importansya sa paghatag og luwas, matinagdanon, ug mahigugmaong panimalay alang sa husto nga pagdako sa bata.
Tumong sa aktibidad nga mapalig-on ang pagsabot sa publiko sa tinuod nga kahulugan sa pag-amuma ug sa dakong papel sa pamilya sa pagpanalipod sa kaayohan ug kaugmaon sa kabataan.
Sa pagpanguna ni Mayor Eddie Justin Quimbo, gipakita sa LGU Gutalac ang padayon nga suporta niini sa mga programa nga nagatutok sa kabataan ug pamilya, isip kabahin sa ilang serbisyo nga “Excellent, Just, and Quality Service” para sa tanang Gutalacnons.(IKEN B. GULLEM)
Source: LGU GUTALAC-PUBLIC INFORMATION