Nakadawat og tabang si Melody Balbosa, 59 anyos, minyo ug residente sa Sitio Supot, Barangay Tamaruc, Jose Dalman, Zamboanga del Norte, human siya mapili isip benepisyaryo sa Adopt-a-Family Program nga gipahigayon sa 1st Zamboanga del Norte Mobile Force Company.
Gihatagan si Balbosa og nagkalain-laing grocery items, bugas, vitamins, ug solar light nga makatabang sa iyang adlaw-adlaw nga panginahanglan, ilabina sa kahimtangan sa suplay sa kahayag ug panglawas sa ilang panimalay.
Dugang pa niini, mipahigayon og libre nga medical check-up ang usa ka doktor gikan sa Jose Dalman Rural Health Unit ug mihatag og mga pahimangno sa panglawas, nga naghatag og dugang kahayahay ug pag-atiman sa benepisyaryo isip kabahin sa padayon nga pagduol sa serbisyo sa komunidad.(JENIFFER JR. DELICA)
Source/Photo Courtesy: Zamboanga del Norte 1st Provincial Mobile Force Company