Nakatabang ang Community Environment and Natural Resources Office (CENRO) Liloy, pinaagi sa Protected Area Management Office (PAMO) sa Murcielagos Island Protected Landscape and Seascape (MIPLS), sa luwas nga pag-abot sa 95 ka critically endangered Hawksbill sea turtle hatchlings ngadto sa dagat.
Nahitabo ang pagtabang atol sa nighttime biodiversity monitoring activity human natural nga migawas ang mga hatchling gikan sa ilang nest sa MIPLS Eco Park pasado alas-8:40 sa gabii.
Atol sa assessment, nakit-an sa mga personnel nga layo-layo ang nahimutangan sa nest gikan sa shoreline ug napugngan sa baga nga mga tanom sa baybayon ang agianan sa mga hatchling padulong sa dagat.
Tungod niini, mahimong malangan o dili makalahutay ang mga hatchling tungod sa kakapoy ug posibleng pagkapriso sa mga tanom, samtang mahimo usab silang mahimong tukbon sa mga manunukob sa dili pa makaabot sa tubig.
Gisunod sa trained personnel ang saktong wildlife handling protocols sa pagtabang sa mga hatchling. Gikolekta kini pag-ayo gamit ang limpyo nga basin ug gibalhin ngadto sa angay nga release point nga mas duol sa shoreline.
Gikan sa maong lugar, natural nga mikamang ang 95 ka hatchling padulong sa dagat, usa ka kinaiyanhong pamatasan nga makatabang kanila sa paghinumdom sa ilang natal beach nga ilang mahimong balikan sa umaabot alang sa pagpangitlog.
Ang malampusong pagpagawas sa 95 ka hatchling nagpakita sa importansya sa MIPLS isip protektadong lugar alang sa pagpreserbar sa marine turtles, lakip na ang padayong pagpaningkamot sa CENRO Liloy ug PAMO-MIPLS sa pagpanalipod sa wildlife.(IKEN B. GULLEM)
Source: DENR ZAMBOANGA PENINSULA