Gikalatid nga paga-butangan og 91 ka mga Solar Street Lights ang Sta. Cruz Village o Relocation Site sa Laoy, Olingan ning dakbayan.
Kini human gipahigayon ang ground breaking ceremony Agosto 11 ning tuiga didto sa Purok Forever sa nasangpit nga barangay alang na sa pag-instalar sa 91 ka units sa Solar Street Lights.
Ang maong proyekto nga nagkantidad og Php 3,695,000.00 nga nagagikan sa Department of Human Settlements and Urban Development (DHSUD) ilawom sa Resettlement Governance Assistance Program Fund (RGAPF).
Niini, gipasalamatan ni Mayor Darel Dexter T. Uy ang DHSUD sa paghatag sa maong proyekto dinhi sa dakbayan sa Dipolog. Gibutyag usab sa mayor nga dili lamang kini maoy proyekto nga gitagana sa Sta. Cruz Village kon dili aduna pa’y nagsunod nga road concreting project ug drainage canal nga mokantidad og Php6M.
Buot usab ni Mayor Uy nga hatagan og mga livelihood projects ang mga lumulupyo sa maong dapit aron mas molambo pa ang ilang panginabuhian.
Samtang gisaysay usab ni OIC-Regional Director Roland P. Eta nga ikaduha sa listahan ang Zamboanga Peninsula nga nakadawat sa pinaka-taas nga kantidad sa proyekto sa tibuok nasud.
Nasayran gikan sa Regional Director Eta nga ang RGAPF dunay  kinatibuk-ang pundo nga Php40M ning tuiga alang na sa mga proyektong i-implementar nationwide og Php8M niini ang gipahat sa Rehiyon 9 diin ang Dipolog maoy nakadawat sa Php4M, samtang ang Pagadian ang nakadawat sa katunga.
Gipahalipayan ni RD Eta si Mayor Uy tungod sa maayong pagdumala niini sa pang-gobyerno hinungdan nga daling nadawat sa kagamhanang lokal ang nasangpit nga grant nga na-conceptualized sa uwahing bahin pa lamang sa tuig 2021.
(Source: Dipolog City Government Facebook page)