Gidali og dala sa ospital ang usa ka 81 anyos nga lalaki human kini maaksidente sa kadalanan sa Barangay Galingon, Tampilisan, Zamboanga del Norte, alas 4:05 sa hapon niadtong Hulyo 28.
Sa inisyal nga pag-assess sa Local Disaster Risk Reduction and Management Office sa Tampilisan, naangkon sa pasyente ang samad sa ulo ug mga minor nga samad sa taas ug ubos nga bahin sa lawas. Gihatagan dayon siya og unang tabang sa lugar sa insidente.
Human sa paghatag og first aid, luwas nga gidala ang pasyente sa Liloy Hospital aron matambalan ug mahatagan og dugang medikal nga pag-atiman.
Samtang, nagpahimangno ang LDRRMO sa mga motorista nga mag-amping kanunay sa pagbiyahe ug giawhag usab ang mga tag-iya sa mga hayop nga bantayan ang ilang mga binuhi aron malikayan ang mga aksidente sa kadalanan.(JENIFFER JR. DELICA)
Source: LDRRMO Tampilisan