Tingkagol sa prisohan ang usa ka 58 anyos nga Lalaking Konsihal sa Barangay nga nasakmitan og mokapin sa 7 ka gramos sa gituohang Ilegal nga Drogang Shabu, pinaagi sa gipahigayon nga hiniusang pagserve og Search Warrant sa mga kapulisan, nga gipangunahan sa mga personahe sa Jose Dalman Municipal Police Station, didto sa Barangay Manawan sa nasangpit nga Lungsod, ning Probinsiya sa Zamboanga Del Norte, kagahapon sa may alas 4:00 ang takna sa kaadlawon, Setyembre 25, 2025.
Giila sa Jose Dalman Pnp ang dinakpan sa alyas nga Basyong, 58 anyos minyo, Lumolupyo sa Barangay Manawan, Lungsod sa Jose Dalman, diin usa kini ka konsihal sa mao nilang Barangay, nga matud pa sa maong nilang operasyon, bit-bit niini ang Search Warrant nga naka doket ubos sa Criminal Case Number 04 2025, nga giisyu ni Abraham S. Marcaban ang Presiding Judge sa 9th Judicial Region, Branch 11, Sindangan, Zamboanga del Norte, penitsahan og Setyembre 23, 2025.
Pagkahuman matud pa nga natunol ngadto sa Suspetsado ang naasoy nga Search Warrant, gipahigayon dayon ang searching ngadto sa nahimutangan sa maong Suspect, nga miresulta sa pagkasakmit sa gituohang Ilegal nga Drogang Shabu, nga motimbang og 7.5402 gramos, diin gibana-bana ang kantidad niining mokabat ngadto sa Php51,273.00, base sa Street Value niini.
Gipadala dayon ngadto sa Zamboanga del Norte Provincial Forensic Unit 9 ang mga nakumpiskang gituohang Ilegal nga Drogang Shabu gikan sa dinakpan alang na sa ipahigayon nga eksaminasyon, samtang ang Suspetsado atua na ubos sa kustodiya sa Jose Dalman Mps alang na sa tukmang disposisyon, diin nakatagana na niining mag-atubang sa kasong pagsupak sa Republic Act 9165 (Comprehensive Dangerous Drugs Act of 2002).(Julius Esmade)
Source: ZNPPO