Malampusong nasikop ug nasakmitan sa kapulisan ug mga loosed firearms ang usa ka 49 anyos nga lalaki niadtong Agosto 4, 2026, mga alas 4:40 sa hapon,didto sa Sitio Mangingisda, Barangay Calatunan, Sindangan, Zamboanga del Norte.
Ang pagkadakop sa suspek ug pagkakumpiska sa nasangpit nga armas gihimo pinaagi sa mga personahe sa Sindangan Municipal Police Station (MPS), uban sa koordinasyon sa 1st Zamboanga del Norte Provincial Mobile Force Company (1st ZNPMFC) ug sa 97th Infantry Battalion, Philippine Army (97IB, PA).
Atol sa operasyon nakumpiska gikan sa dinakpan ang kalibre 45 Colt MK IV Series 80 Safari Arms pistol nga adunay serial number 939435, duha ka magasin sa kalibre .45 nga pistola, tresi ka buhing bala sa kalibre .45, ug usa ka itom nga sling bag.
Ang search warrant gi-isyu sa Regional Trial Court, Branch 11, Ninth Judicial Region, Sindangan, Zamboanga del Norte, nga gipetsahan Hulyo 27, 2026.
Ang suspek gipailalom sa medical examination sa Sindangan District Hospital sa dili pa gidala sa Sindangan MPS, uban sa mga nakumpiska nga ebidensya, alang sa hustong dokumentasyon ug pagpasaka sa angay nga mga kaso.(MEDALYN U. BORJA)
Source: ZNPPO