Malampusong nasikop sa mga personahe sa kapulisan ang usa ka habal-habal driver nga nag sideline sa pagpamaligya ug shabu atol sa gikasa nga search warrant operation niadtong Mayo 27, 2026, didto sa Purok Buli, Barangay Minaog, Dipolog City, Zamboanga del Norte.
Ang nasikop nga suspek giila nga usa ka 47-anyos nga lalaki, ulitawo, habal-habal driver, high school graduate, ug residente sa Purok Buli, Barangay Minaog, dakbayan sa Dipolog.
Ang pagdakop gihimo pinaagi sa mga personahe sa Police Station (SDET), kauban ang Regional Drug Enforcement Unit 9 (RDEU9) ug ang 5th Special Operations Unit-Maritime Group, uban sa koordinasyon sa Philippine Drug Enforcement Agency (PDEA) Region 9, pinaagi sa pagpatuman sa Search Warrant No. EJ-SW-22-26 nga gipetsahan Mayo 25, 2026, nga gi-isyu sa Regional Trial Court, Branch 6, Dipolog City, tungod sa paglapas sa Republic Act No. 9165, o nailhan usab nga Comprehensive Dangerous Drugs Act of 2002.
Atol sa operasyon, nakumpiska sa mga awtoridad ang nagkadaiyang pakete sa gituohang shabu nga adunay gibanabanang gibug-aton nga 3 ka gramo nga adunay standard nga presyo sa droga nga Php20,400.00, lakip ang mga butang nga dili druga.
Ang nakumpiska nga mga ebidensya sa droga itugyan ngadto sa Zamboanga del Norte Provincial Forensic Unit alang sa laboratory examination, samtang ang nadakpan nga suspek nagpabilin ubos sa protective custody sa Dipolog City Police Station samtang nagpaabot sa pagpasaka sa angay nga mga kaso.(MEDALYN U. BORJA)
Source: ZNPPO