Dakpan sa kapulisan ang usa ka 38 anyos nga babaye, tungod sa nabuhat niining pagsupak sa Republic Act 9165 (Comprehensive Dangerous Drug Act of 2002) pinaagi sa gipahigayon nga hiniusang pagserve og Search Warrant nga gipangunahan sa mga personahe Tabina Municipal Police Station (TMPS), didto sa Purok Saniblangis, Barangay Poblacion, Lungsod sa Tabina, Probinsiya sa Zamboanga Del Sur, kagahapong adlawa, Setyembre 22, 2025 sa may alas 10:33 sa buntag.
Base sa pahayag nga giluwatan sa Tabina Pnp, nga sa ilang gibuhat nga operasyon bit-bit nila ang Search Warrant alang sa Suspect nga si alyas Gang-gang, nga Lumolupyo ra usab sa nasangpit nga Lugar, samtang ang kauban niini paspas nga nakasibat ug wala kini nasikop sa maong mga awtoridad.
Matud pa nga pagkahuman nila napakita ngadto sa Suspetsado ang Search Warrant nga giisyu gikan sa RTC Branch 23, Molave, gi-utingkay dayon nila ang gipoy-an ni alyas Gang-gang, ug didto ilang nakumpiska ang Tulo ka Sachet’s sa gituohang Iligal nga Drogang Shabu, ug ang Tulo usab kabuok Aluminum Foil.
Gipadala dayon ngadto sa Provincial Forensic Unit ang nakumpiska gikan sa naasoy nga Suspetsado alang na sa ipahigayon nga eksaminasyon, samtang ang dinakpan atua gidala sa Tabina (MPS) alang na sa tukmang disposisyon, samtang ang naka-ikyas nga iyang kauban, padayon pang gipangita sa kapulisan.(Julius Esmade)