Nakadawat og Cash Grant Assistance ang 35 ka pamilya nga biktima sa bagyong Odette ilawom sa Emergency Housing Assistance Program sa National Housing Authority (NHA) niadtong Huebes Hunyo 23.
Si Mayor Darel Dexter T. Uy uban nila ni Ms. Mary Jane D. Antipuesto, kinsa maoy representante ni Al-Khwarizmi U. Indanan, Regional Manager sa NHA R9 ug Ms. Jovie Orilla, Assistant CSWDO, ang mi-apod-apod sa nasangpit nga ayuda ngadto na sa 34 ka mga biktima gikan sa Brgy. Olingan samtang usa usab ang nagagikan sa Brgy. Gulayon tanan ning dakbayan sa Dipolog.
Sumala sa nasayran, Php 30,000.00 ang kantidad nga nadawat alang niadtong mga biktima kinsang balay ang na-identify nga totally damaged samtang Php 20,000.00 usab alang niadtong partially damaged.
Matod pa ni Ms. Antipuesto, ang maong kantidad dili gayod makahuman kon magtukod og balay apan kini makatabang na dinha sa pagsugod og tukod sa ilang pinoy-anan. Gihangyo usab niini ang mga biktima nga gamiton ang nasangpit nga kantidad pagbarog og balik sa ilang balay tungod kay mao man ang katuyoan sa nasangpit nga ayuda.
Gi-awhag usab ni Mayor Uy ang mga biktima nga magpabiling ligdong dinha sa pakigbisog sa kinabuhi, maghi-usa, magtibangay ug mosalig sa Ginoo aron padayon ang paglambo sa kinabuhi. Gipasalamatan usab niini ang NHA sa paghatag ug ayuda sa mga Dipolognon ug sa pakigtambayayong kanunay sa kagamhanang lokal sa Dipolog.
Ang Emergency Housing Assistance Program (EHAP),maoy usa ka programa sa NHA Â nga maghatag og ayudang pinansiyal sa mga pamilyang apektado sa natural o man-made calamities aron makapabarog og balik sa ilang panimalay nga na-distroso panahon sa kalamidad.
(News & photo courtesy of Dipolog City Government Facebook page)