Balhog sa prisohan homan masikop ang usa ka 32 anyos nga Street Level Individual atol sa gikasa nga buy-bust operation sa mga personahe sa kapulisan didto sa Purok Orchids, Barangay Poblacion North, Piñan, Zamboanga del Norte,mga alas 11:01 ang takna sa kagabhion niadtong Pebrero 25, 2026.
Ang maong dinakpan naila nga usa ka 32 anyos nga lalaki, kinsa gidakop sa mga operatiba sa Municipal Drug Enforcement Team (MDET) sa Piñan MPS, uban sa koordinasyon sa RMFB 9, ZNPIU, ug ZNPMFC,tungod sa paglapas sa Sections 5 ug 11, Article II sa Republic Act 9165 (Comprehensive Dangerous Drugs Act of 2002).
Nakuha atol sa operasyon gikan sa suspek mao ang nagkadaiyang pakete sa gituohang shabu nga gibanabanang motimbang og kapin o kulang duha ka gramo nga nagkantidad ug Php13,600.00. uban ang marked money ug usa ka improvised container.
Ang mga nakumpiska nga butang isumite alang sa laboratory examination, samtang ang dinakpan anaa sa kustodiya sa Piñan MPS alang sa hustong disposisyon.(MEDALYN U. BORJA)
Source: ZNPPO