Timbog sa opertiba ang tulo (3) ka lalaki sa gihimo nga anti-illegal gambling operation didto sa Zamoras St. corner Garcia St., Biasong, Dipolog City niadtong Abril 9, 2022 sa kapin kun kulang alas 2 sa hapon.
Giila ang mga nadakpan nga sila si Rey Ganta Almedilla, 40 anyos, minyo ug residente sa Basagan, Katipunan, ingon usab ni Joellito Reganion Albiso, 46 anyos, minyo ug lumulupyo sa Barangay Nanginan sa susamang lungsod ug si Joas Jebone, 35 anyos, ulitawo ug residente sa Obay, Polanco Zamboanga del Norte.
Ang maong operasyon gihimo sa Intelligence operatives sa Dipolog City Police Station uban sa pagpangulo ni Police Lieutenant Berjohn Tianok.
Matud pa nga ang giingon 3 ka-indibidwal nasakpan sa akto nga naglambigit sa illegal nga sugal nga gitawag ug “tong-its” nga naghinungdan sa ilang pagka-aresto.
Nakumpiska gikan sa mga suspek ang bet money nga may kantidad nga P556 sa lain-laing denominasyon ug usa ka deck plastic nga baraha.
Ang mga suspetsado uban sa mga items nga narekober gidala sa Dipolog City Police Station ug naa na ilawom sa kustodiya sa kapulisan para sa una nang pagsang-at sa angay nga kaso sa korte. (Liccin V. Bello)