Malampusong napahigayon kaniadtong Nobyembre 29, 2023 ang 2nd Provincial Organic Agriculture Congress didto sa Zamboanga del Norte Convention and Sports Center (ZNCSC) nga nahimutang sa Barangay Estaka, ning Dakbayan sa Dipolog.
Ang ZNAg Farmers’ Organization mao ang numero unong supplier sa mga utanon, lagutmon, ug mga panakot nga gipamaligya atol sa pagpahigayon sa ZNag Kadiwa ng Pangulo.
Mitambong usab sa maong Congress ang 16 ka kahugpungan sa mga mag-uuma nga gimugna sa Social Action Center sa Diocese sa Dipolog nga gipanguluhan ni Rev.Fr. Ramil Corong.
Sila nagagikan sa lungsod sa Sergio Osmeña, Mutia, Piñan, Roxas, Jose Dalman, Siayan, Godod, Kalawit, Polanco, ug sa Dakbayan sa Dipolog ug Dapitan.
Si DA-9 RED Reynaldo Campomanes nga girepresentahan ni DA-Provincial Office Head, Mr. George Valiente, nagkanayon nga ang nasudnong Kagamhanan pinaagi sa Department of Agriculture ang nagpatuman og mga programang gilaumang makapalambo sa kinabuhi sa mga mag-uuma, nga giilang mga bag-ong bayani, isip tinubdan sa atong pagkaon.
Gipasabot usab ni Ms. Janice Legaspi, Regional Organic Agriculture Program Focal Person ang overview sa maong programa, samtang gipaambit usab ni Fe Andus sa Silano Piπan Farmers Association sa ilang kasinatian sa dihang gisagop na nila ang organikong pamaagi sa pagpanguma.
Ilalom sa ZNag Program, gihugpong ang mga mag-uuma aron mahimong usa ka asosasyon nga gisuportahan sa Kagamhanang-Probinsyal pinaagi sa paghatag kanilag binhi ug uban pang planting materials, ingon man abono ug tabang-pinansyal nga ilang gikinahanglan.
(Source: Provincial Government of Zamboanga del Norte Facebook page)