Mikabat sa 29 ka Rotary Youth Leaders ang milingkod isip opisyales ug hepe sa nagkalain-laing buhatan sa Dipolog karong semanaha.
Kini human gipahigayon ang “Installation and Opening Ceremony” sa Rotary Youth Week kagahapon, Nobyembre 14, sa flag ceremony sa kagamhanang lokal.
Sumala sa na-andan, ang Youth Leaders nagagikan sa nagkalain-laing tulonghaan dinhi sa Dipolog, milingkod isip mga opisyales ug hepe sugod kagahapon hangtod sa adlaw’ng Biyernes, Nobyembre 18, isip tipik sa ilang training dinha na sa pagdumala sa gobyerno.
Si Vice-mayor Senen O. Angeles kinsa maoy mi-welcome ug mipahigayon sa pagpanumpa sa nasangpit nga mga Youth Leaders, nanghinaot nga duna silay makat-onan ning usa ka semana nga kalihukan. Dugang pa niya, nga kini usa ka maayong programa sa Rotary Club nga makatudlo sa mga kabataan sa maayong hiyas sa usa ka lider.
Kini usa ka pribilihiyo ug kasinatian nga maka-umol kanila sa umaabot kon sila na usab ang modumala sa pang-gobyerno.
Gipasalamatan ni Ms. Grichelle J. Guillano, Presidente sa Rotary Club sa Dipolog ang siyudad sa padayon niining suporta ug pagtambabyayong sa mga programa ug kalihukan sa Rotary Club sulod na sa 40 ka tuig.
(Source: Dipolog City Government Facebook page)