Arestado ang usa ka 29 anyos nga lalaki nga nag atubang sa kasong paglapas sa RA 7610 atol sa gipatuman nga operasyon mga alas 6:40 sa gabii niadtong Mayo 9, 2026, didto sa Purok 4, Barangay Dicayas, Dipolog City, Zamboanga del Norte.
Ang maong dinakpan naila nga si alyas “Ran” 29 anyos, lalaki, ulitawo, barbero, ug residente sa nahisgutang lugar kinsa gialigar nga nalambigit sa usa ka insidente sa pagpangulata nga naglambigit sa usa ka menor de edad nga hingpit nga paglapas sa Republic Act 7610 o ang “Special Protection of Children Against Abuse, Exploitation and Discrimination Act.”
Nasayran nga ang Duty Tactical Operations Center nakadawat og tawag sa cellphone gikan sa Emergency Operation Center bahin sa insidente.
Tungod niini, ang mga duty mobile patrollers sa Dipolog City Police Station gipadala dayon ug miabot sa lugar.
Sa pag-abot sa lugar nga nahitabuan nadiskobrehan sa mga mirespondeng personahe nga ang kagubot nahunong na uban sa tabang sa mga barangay tanod.
Sa inisyal nga imbestigasyon, nasayran nga ang suspek giingong nasuko sa biktima, usa ka menor de edad nga lalaki ug residente sa samang barangay, ug human niini balik-balik nga gisumbag ang biktima.
Ang biktima gidala gilayon sa Corazon C. Aquino Hospital alang sa medikal nga atensyon.
Samtang ang suspek gipahibalo sa hinungdan sa iyang pagkadakop ug mga katungod sa konstitusyon sa pinulongan nga iyang nasabtan ug anaa na kini karon sa kustodiya sa Dipolog City Police Station alang sa hustong disposisyon.(MEDALYN U. BORJA)
Source: ZNPPO