Magtukod og usa ka community-managed retail store ang 27 ka miyembro sa Pulauan Alliance Labor Union (PALU) human makadawat og ₱1 milyon nga livelihood assistance gikan sa Department of Labor and Employment (DOLE) Zamboanga del Norte Field Office ubos sa DOLE Integrated Livelihood Program (DILP).
Giturn-over ang maong ayuda niadtong Agosto 3 sa Pulauan Port sa Barangay San Vicente, Dapitan isip kabahin sa Project PALU-SUG: Establishment of a Multi-Concept Retail Enterprise for Community Growth and Sustainability.
Nagtumong ang proyekto sa paghatag og malungtarong panginabuhian pinaagi sa pagtukod og retail enterprise nga dumalahon mismo sa mga miyembro sa PALU, nga gilauman usab nga makahatag og mas sayon nga akses sa mga batakang panginahanglan sa komunidad.
Lakip sa gihatag nga assistance ang commercial refrigeration units, coffee vending machines, microwave oven, gas stove, retail display equipment, storage containers, weighing scales, lamesa ug lingkuranan, ingon man grocery items, bugas, ilimnon, animal feeds, ug uban pang paninda alang sa pagsugod sa operasyon sa tindahan.
Sa wala pa ang turnover, gipaapil usab ang mga benepisyaryo sa mga pagbansay sa PhilHealth YAKAP, basic first aid, financial literacy, ug occupational safety and health (OSH) aron maandam sila sa husto nga pagdumala sa ilang negosyo.
Matud ni Senior Labor and Employment Officer Megajane S. Ligutom, representante ni Chief Labor and Employment Officer Elamsalih E. Ungad, ang proyekto dili lamang paghatag og livelihood package kondili usa ka pamuhunan aron mapalig-on ang kapasidad sa mga miyembro sa PALU sa pagmugna og malungtarong panginabuhian.
Ang maong proyekto kabahin sa padayon nga programa sa DOLE sa pagtabang sa mga vulnerable workers pinaagi sa pagpalambo og mga community-based livelihood nga makahatag og dugayng tinubdan sa kita ug makatampo sa paglig-on sa lokal nga ekonomiya.(IKEN B. GULLEM)
Source: DOLE IX- Zamboanga del Norte Field Office