Nagtinabangay ang Local Government Unit (LGU) sa Katipunan, Katipunan Municipal Police Station, ug nagkalainlaing ahensya sa gobyerno sa pagpahigayon og Information Caravan ug Medical Outreach Program sa Barangay Dabiak aron maduol ang batakang serbisyo sa mga residente.
Gipangunahan ang kalihokan sa LGU Katipunan ubos ni Mayor Jose Michael Meiko A. Wong, uban sa Katipunan Rural Health Unit nga gipangulohan ni Dr. Kei Ruud Piperno, Katipunan MPS ubos sa pagdumala ni PMAJ Evelyn F. Porras, Acting Chief of Police, pinaagi kang PLT Chrissa Mae G. Patriana, Deputy Chief of Police.
Mitambong usab ang 97th Infantry Battalion, mga opisyal ug tanod sa Barangay Dabiak, Barangay-Based Advocacy Group, ug uban pang mga ahensya sa gobyerno aron maghatag og impormasyon ug nagkalainlaing serbisyo alang sa komunidad.
Sumala sa mga tigpasiugda, tumong sa maong kalihokan ang pagpalig-on sa panaghiusa sa mga ahensya sa gobyerno, lokal nga panggamhanan ug komunidad, pagdasig sa aktibong partisipasyon sa mga residente, ug pagpalambo sa kahibalo ug kahandam sa publiko.(IKEN B. GULLEM)
Source: Katipunan Municipal Police Station ZNPPO