Nagtingkagol karon sa prisohan ang usa ka gwardiya homan kini masikop ug makumpiskahan sa kapulisan ug ilegal nga drugas atol sa gipatoman nga buy bust operation mga alas 10:20 ang takna sa kagabhion niadong Hunyo 5, 2026, didto sa Purok Narra, Brgy. Sulangon, Dapitan City, Zamboanga Del Norte.
Naila ang maong dinakpan nga usa ka 27 anyos ,lalaki, ulitawo, guwardiya ug residente sa Purok 3, Brgy. Linabo, Dapitan City, kinsa nalista isip Street Level Individual (SLI) sa Illegal Drugs watchlist sa Dapitan CPS, tungod sa paglapas sa Republic Act No. 9165,( Comprehensive Dangerous Drugs Act of 2002).
Ang pagkadakop sa suspek ug pagkakumpiska sa ilegal nga drugas gihimo pinaagi sa mga operatiba sa Dapitan CPS uban sa koordinasyon sa Mabuhay SBC 5th SOU-MG.
Ang operasyon misangpot sa pagkasakmit sa mga awtoridad sa gibana-bana nga 1 gramo sa gidudahang shabu,nga adunay gibanabanang kantidad nga P6,800.00, uban sa nagkalain-laing mga gamit sa droga ug mga butang nga dili droga.
Gipahibalo ang suspek sa hinungdan sa iyang pagkadakop ug mga katungod sa Konstitusyon (Miranda Warning) ug Anti-torture Act sa usa ka diyalekto nga iyang hingpit nga nasabtan ug anaa kini karon kasamtangang gikustodiya sa Dapitan City Police Station samtang nagpaabot sa pagpasaka sa tukmang reklamo.
Samtang ang tanang nakumpiska nga mga butang gi-imbentaryo na ug gisumite sa Zamboanga del Norte Provincial Forensic Unit-9 alang sa chemical examination.(MEDALYN U. BORJA)
Source: ZNPPO