Nakabenepisyo ang 238 ka bulnerableng trabahante sa Zamboanga del Norte sa ₱12.1 milyon nga livelihood grant nga gihatag sa Department of Labor and Employment o DOLE Regional Office 9 ngadto sa Labason Multi-Purpose Cooperative ubos sa Department Integrated Livelihood Program o DILP.
Sumala kang DOLE Regional Director Albert E. Gutib, ang maong ayuda makatabang sa pagpalapad sa oportunidad sa panginabuhian ug pagpakunhod sa kakabus pinaagi sa paghatag og malungtarong tinubdan sa kita alang sa mga benepisyaryo sa lalawigan.
Lakip sa makadawat sa programa ang mga repatriated Overseas Filipino Workers, mag-uuma, mangingisda, displaced skilled workers, mga nakagawas sa Pantawid Pamilyang Pilipino Program, parolees, probationers ug mga ginikanan sa child laborers. Pinaagi sa Labason Multi-Purpose Cooperative, matag benepisyaryo makadawat og livelihood packages aron makasugod og kaugalingong panginabuhian.
Gipasalamatan sa Labason Multi-Purpose Cooperative ug sa Lokal nga Panggamhanan sa Labason ang DOLE sa maong suporta ug mipasalig nga hapsay nga ipatuman ang proyekto aron makatabang sa pagpalig-on sa panginabuhian sa mga benepisyaryo sa lalawigan.(JENIFFER JR. DELICA)
Source: DOLE Liloy Satellite Office