Gibalhin sa kagamhanang probinsyal ang 226 ka Persons Deprived of Liberty (PDLs) gikan sa Zamboanga del Norte Correctional and Rehabilitation Center sa lungsod sa Manukan ngadto sa Dipolog ug Dapitan City Jail ubos sa Bureau of Jail Management and Penology.
Ang seremonyal nga pagbalhin gipahigayon sa Plenary Hall sa Zamboanga del Norte Convention and Exhibition Center kaniadtong Oktobre 24, diin gipangulohan ni Governor Darel Dexter Uy uban sa mga opisyal sa BJMP ug korte. Gipasalamatan ni Judge Felin Legara-Comidoy si Governor Uy sa maong inisyatiba nga makapadali sa pag-atubang sa korte sa mga PDLs nga adunay kaso.
Gipahayag ni JSUPT Mashur Sala nga kini nagpakita sa tinuod nga serbisyo ni Governor Uy alang sa katawhan sa probinsya. Dugang pa, gipirmahan usab ang kasabutan tali sa BJMP, DILG, ug probinsyal nga kagamhanan aron mapalambo pa ang maayong koordinasyon ug pagdumala sa mga pasilidad sa bilanggoan.(Jeniffer Jr. Delica)
Source/Photo Courtesy: Zamboanga del Norte Provincial News Network