Gipresentar sa National Irrigation Administration (NIA) Zamboanga del Norte ang ilang plano sa mga proyekto sa irigasyon alang sa tuig 2026–2027 ngadto kang Gobernador Darel Dexter T. Uy atol sa usa ka courtesy call, kaniadtong milabay nga adlaw.
Lakip sa gipadayag ang mga dako nga Small Reservoir Irrigation Projects nga karon naa pa sa feasibility study. Tumong niini ang mas lig-on ug padayon nga suplay sa tubig alang sa mga umahan sa probinsya, ilabi na sa tingtugnaw ug ting-init nga panahon sa tanom.
Matud pa sa NIA, ang mga proyekto makatabang sa pagtaas sa produksyon sa agrikultura ug pagpalambo sa panginabuhian sa mga mag-uuma, bisan pa sa hulaw o kulang nga ulan.
Atol sa courtesy visit, gipangunahan kini ni Acting Manager Engr. Marie Therese T. Taladua uban sa mga teknikal nga kawani sa NIA. Gikumpirma usab sa duha ka ahensya ang ilang panaghiusa sa pagpalig-on sa agrikultura ug kasiguruhan sa pagkaon sa Zamboanga del Norte.(IKEN B. GULLEM)
Source: NIA ZAMBOANGA PENINSULA