Aprobado na sa Zamboanga del Norte Provincial Peace and Order Council ang 2024 Confidential Fund sa PPOC nga nagkantidad og 150 milyones ka pesos sa gipahigayong PPOC Special Meeting Desyembre 27, 2023 sa Zamboanga del Norte Convention and Exhibition Center.
Ang maong PPOC Special Meeting nga gibuksan ni Governor Rosalina “Nene” Jalosjos via zoom ug gipadayon ni Provincial Administrator Mr. Wilberth“Jojo” Magallanes gipatawag gumikan sa Confidential Fund sa PPOC sa 2024 ug ang nahitabong engkwentro tali sa mga elemento sa miltar ug sa mga rebeldeng grupo didto sa La Libertad, Zamboanga del Norte niadtong Disyembre 22, 2023.
Ang 2024 Confidential Fund sa PPOC nakab-ot human gidasonan sa mga membro sa PPOC ang resolusyon nga giduso ni Zamboanga del Norte DILG Provincial Director Oliver Ombos nga naghangyo ni Department of the Interior and Local Government-9 Regional Director Paisal Abutazil pag-isyu og sertipikasyon nga maghatag ug pagtugot sa pagpagawas ug paggamit sa 2024 Confidential Fund sa PPOC sa kantidad nga 150 milyones ka pesos.
Gituki usab sa PPOC Special Meeting ang nahitabong panag-engkuwentro tali sa mga elemento sa 10th Infantry Battalion ilalom sa 102nd Infantry Brigade didto sa lungsod sa La Libertad, Zamboanga del Norte niadtong Disyembre 22, 2023.
Sa taho sa militar, usa ka elemento sa 10thIB ang nasamdan apan sa kasamtangan, anaa kini sa stable nga kondisyon.
Sa pagpasabot ni Col. Pilapil sa pagsulod sa 10thIB sa hurisdiksyon sa 97thIB, matod pa niya, walay giilang utlanan ang paggukod sa mga dautang elemento, partikularmente ang teroristang rebeldeng New People’s Army.
Ang importante lang matod pa ni Col. Pilapil, nga dunay koordinasyon uban sa mga tropa nga na-assign sa lugar sa ilang operasyon gawas sa ilang hurisdiksyon.
Ang pamahayag ni Col. Pilapil gikompirmar usab sa 97thIB ug sa Zamboanga del Norte Police Provincial Office pinaagi ni Lt. Col. Roselily Baguio kinsa mirepresentar ni Provincial Director Col. Glenn M. Dulawan sa maong tigom.
(Source: Provincial Government of Zamboanga del Norte Facebook page)