Mokabat sa 2,000 ka mga pamistang food packs ang giapod-apod ngadto sa mga Dipolognon atol sa pag selebrar sa kapistahan ni Sr. San Vicente Ferrer, niadtong Sabado sa buntag, didto sa Museo, ning dakbayan sa Dipolog, Mayo 18, 2024.
Gihimo ang maong pag apod-apod sa food packs, pinaagi sa Mayor ning dakbayan sa Dipolog nga si Mayor Darel Dexter T. Uy, diin giisip nga usa ka gasa gikan sa kagamhanang lokal alang sa tanang mga Dipolognon nga subling gikalipay sa tanan.
Tumong niini nga maka-kaon ang mga katawhan, ilabi na kadtong dili mga taga Dipolog nga midagsa lang sa siyudad aron sa pagdagkot sa kandila ug pagsimba, isip ilang panaad ngadto kang Sr. San Vicente Ferrer.
Gi prayoridad sa paghatag mao ang mga senior citizens, buntis ug Persons with Disability (PWD), isip konsiderasyon sa ilang kahimtang, nga dili na sila magkalisod sa pagkuha sa ilang bahin.
Kahinumdoman nga si City Mayor Darel Dexter T. Uy, taud-taod nang nag apod-apod og mga food packs matag saulog sa kapyestahan sa dakbayan, diin tumong niini nga mapa-ambit sa kagamhanang lokal ang mga gasa nga na-angkon sa mga Dipolognon sa nilungtad nga malambuon. (Medalyn U. Borja)
(Source: Dipolog City Government)