Nakadawat og tag Php100,000.00 nga cash benefit ang duha ka centerinarian nga mulupyo sa Brgy. Turno ning dakbayan sa Dipolog niadtong, Marso 23 ning tuiga.
Ang Rehiyonal nga buhatan sa Department of Social Welfare and Development (DSWD) kauban ang City Social Welfare and Development Office (CSWO) mao ang mitunol sa nasangpit nga benepisyo ngadto nila ni Mr. Paterio O. Saile ug Mrs. Coronacion A. Baylon diin kining duha ang nagpangidaron og 100 years ug kwalipikado na nga modawat sa maong kantidad sumala sa nakatakda sa Akta Republika 10868 nga nailang “Centenarian Act of 2016”.
Nasayran si Mr. Saile, usa ka retiradong City Civil Registrar sa Dipolog ug adunay pito(7) ka mga anak. Sa iyang pangidaron nga 100 years old, baskog pa kini nga nakipag himamat sa mga personahe sa nahisgutan mga ahensiya. Matod pa niini nga sekreto niya alang sa taas nga kinabuhi mao ang Ginoo.
Samtang laing centenarian, si Ms. Baylon ang malipayon usab nga midawat sa nasangpit nga benepisyo. Siya kanhiay usa ka magtutudlo ug dunay 3 ka mga anak ug ang sekreto niini sa iyang “long life” mao ang paborito niyang pork adobo, malunggay soup ug coke. Hilig usab ni Ms. Baylon ang ballroom dancing apan na-undang kini sa dihang mi-abot ang pandemya.
Nasayrang ang 100 years nga ginang ang walay bisan unsang maintenance nga tambal gawas lamang sa mga bitamina nga giresita kaniya.
“Do not entertain small problems”, kini ang tambag ni Ms. Baylon aron magpabiling baskog ang panglawas.
(Source: Dipolog City Government Facebook page)
