Malampusong napahigayon ang 1st Quarterly General Meeting sa Senior Citizens’ Federation sa Dakbayan sa Dapitan kaniadtong Enero 15, 2026, sa City Government Center Amphitheater.
Gitambongan kini sa 43 ka barangay presidents gikan sa nagkadaiyang barangay sa dakbayan, nga nagsilbing hinungdanong plataporma sa panag-uban, diskusyon, ug pagdesisyon alang sa mas lig-on nga panaghiusa sa mga lider sa katigulangan.
Gipangulohan ang miting ni Federation President Nicanor Galanido, ug gitamdan usab sa presensya sa mga opisyal sa dakbayan nga nagpakita sa ilang padayon nga suporta sa kahimtangan sa mga senior citizen, lakip si CSWD Officer Marilyn Saldon-Sy, OSCA Head Dr. Elena Hamoy, ug City Councilor Hon. Bienvenido Dini-ay Sr., Chairman sa Committee on Senior Citizens.
Gilawom usab nga gihisgutan ug opisyal nga giaprubahan sa katiguman ang Uniform Election Policy and Guidelines sa Federation sa Senior Citizens sa Dapitan City, aron masiguro ang transparency, hustisya, ug estandardisadong pamaagi sa pagpangulo ug eleksyon.
Gipahigayon usab ang diskusyon mahitungod sa proseso sa Social Pension replacement, diin gihatagan og klarong giya ang mga barangay presidents sa hustong pamaagi aron malikayan ang kalangan ug masiguro nga ang mga kwalipikadong senior citizen makadawat dayon sa ilang benepisyo.
Samtang, magpadayon silang magtinabangay sa pagpatuman sa mga programa ug polisiya nga nagpalambo sa dignidad, ug mas maayong kalidad sa kinabuhi sa tanang senior citizen sa tuig 2026.(IKEN B. GULLEM)
Source: City Government of Dapitan