Pormal nang gibuksan ang ika-16 nga Inter-Agency Sportsfest sa Zamboanga del Norte atol sa seremonya nga gipahigayon sa Zamboanga del Norte Convention and Sports Center ning syudad sa Dipolog niadtong Setyembre 8, 2025.
Ang maong kalihokan gipangulohan sa Provincial Government of Zamboanga del Norte uban sa pakigtambayayong sa Civil Service Commission (CSC), isip bahin sa pagsaulog sa diwa sa serbisyo publiko ubos sa tema: “Bawat Kawani, Lingkod Bayani: Puso, Dangal at Galing Para sa Bayan.”
Si Provincial Governor Hon. Darel Dexter T. Uy mitambong sa pagbukas sa kalihokan ug nagpahinungod og mensahe alang sa tanang partisipante nga mga kawani sa gobyerno, diin iyang gipasiugda ang dakong papel sa sports sa pagtukod og panaghiusa ug pakigtambayayong sa tanang ahensya.
Ang upat ka adlaw nga sportsfest, nga molungtad hangtod Setyembre 11, naglakip sa nagkadaiyang sporting competitions ug highlight sa kalihokan ang “Search for Mr. and Ms. Inter-Agency Sports Festival.”
Pinaagi niini, gitinguha sa provincial government ug sa CSC ang pagpasiugda sa camaraderie, teamwork, ug mas lig-on nga panaghiusa tali sa mga empleyado sa nagkalain-laing ahensya sa gobyerno sa probinsya.(Jumalisa Papa)
Source: Dipolog City Government