Nanguna si Mayor Evelyn T. Uy sa pag-apod-apod sa 197 ka family food packs alang sa mga mananagat sa Barangay Canlucani nga apektado sa bagyong Crising. Ang maong kalihokan gipahigayon didto sa Covered Court Barangay Canlucani, Dapitan City niadtong Septiyembre 8, 2025.
Ang distribusyon gipatuman pinaagi sa panagsabot sa lokal nga pangagamhanan ug sa Department of Social Welfare and Development (DSWD) uban sa tabang sa City Agriculture Office. Ang mga nakadawat nga benepisyaryo mao ang mga rehistradong mananagat sa barangay nga gilista ug gi-validate sa City Agriculture.
Matod ni City Agriculturist Cyril A. Patangan, ang kalampusan sa maong aktibidad posible tungod sa inisyatiba mismo ni Mayor Uy nga midangop sa DSWD Central Office aron masiguro ang ayuda alang sa mga pamilyang apektado. Gidugang pa niya nga ang koordinasyon sa mga opisina sama sa City Social Welfare and Development ug DSWD Regional Office nagpasayon sa maong kalihokan.
Ang matag food pack adunay sulod nga 6 kilos nga bugas, 10 ka lata nga pagkaon, ug 10 sachet nga powdered drink mix, nga makatabang sa mga pamilya sa ilang adlaw-adlaw nga panginahanglan.
Nagpasalamat ang mga benepisyaryo sa ayuda nga nakapahupay sa ilang sitwasyon human masinati ang kalisod nga gidala sa bagyo. Ang maong kalihokan nagpakita sa tinud-anay nga pagtinabangay tali sa lokal nga pangagamhanan, DSWD, ug komunidad aron mapalig-on ang suporta sa mga katawhan.(Jumalisa Papa)
Source: Dapitan City Government