Misukol ang 134 ka mountain bikers gikan sa nagkalain-laing dapit sa Visayas ug Mindanao sa Kinabayo Cross Country Challenge 2026 nga gipahigayon niadtong Hulyo 12 isip usa sa mga nag-unang kalihokan sa Kinabayo Festival sa Dakbayan sa Dapitan. Gipasiugdahan ang lumba sa Barangay Talisay ug miagi sa napulo ka mga kabaranggayan sa baybayon sa dakbayan.
Giorganisar sa Bicycle Association of Dipolog Incorporated o BADI ang maong cross-country race nga adunay napulo ka kategorya alang sa lain-laing edad ug lebel sa mga siklista. Gitambongan kini sa mga batid nga riders, recreational cyclists ug mga batan-ong talento nga misulay sa hagit nga off-road nga ruta.
Gidayeg sa Dakbayan sa Dapitan ang tanang nagdaog ug mga partisipante sa maong kompetisyon, samtang gipasalamatan usab ang mga organisador, mga boluntaryo, sponsors, mga opisyal sa barangay, kapulisan, medical responders ug mga residente nga mitabang aron masiguro ang malinawon, luwas ug malampusong pagpahigayon sa lumba.(JENIFFER JR. DELICA)
Source: Dapitan City Government