Mukabat sa 13 ka reams sa mga giabandonang kontrabandong sigarilyo ang nadiskubrehan sa mga personahe sa Kalawit MPS atol sa gipatoman nga Checkpoint Operation mga alas 10:10 sa kagabhion niadtong Septiyembre 5,2026 didto Sitio Maguboc , Brgy.Poblacion Kalawit, Zamboanga del Norte
Ang maong na diskobreng kontrabando gilangkuban sa 13 ka reams sa Cannon Menthol cigarettes nga gituohang smuggled o ilegal nga produkto.
Nasayrsn nga samtang nagpadayon ang operasyon, usa ka lalaki nga nagsakay og motorsiklo nga walay plaka ang nakabantay sa checkpoint nga kalit kining mibalik ug mipadulong sa direksiyon sa giagian niini.
Tungod niini gilayong gisundsn dayon sa mga operatiba ang nagsakay sa motorsiklo, apan nakalikay kini ug wala na madakpi. Sa paggukod, namatikdan sa mga pulis nga adunay butang nga gilabay sa maong lalaki daplin sa dalan.
Sa pagsusi sa maong butang, ilang nakaplagan ang 13 ka reams sa Cannon Menthol cigarettes nga adunay gibanabanang kantidad nga ₱23,400, base sa standard valuation sa Bureau of Customs (BOC).
Ang mga nakuhang sigarilyo gidala gilayon sa kapulisan samtang nagpadayon ang imbestigasyon aron mahibal-an ang pagkatawo sa responsable ug ang gigikanan sa mga kontrabando.
Gipasalig sa Kalawit police nga ilang ipadayon ang mga operasyon ug uban pang preventive operations aron mapugngan ang pagpalapnag sa mga ilegal nga produkto ug mapanalipdan ang komunidad batok sa mga kalihokan nga supak sa balaod.(MEDALYN U. BORJA)
Source: PNP Kalawit Municipal Police Station